თბილისის საერთაშორისო ტურნირის დასკვნით დღეს, ქართველები უკრაინელებს ეთამაშებოდნენ და ერთხელაც არ ჩაუგდიათ მატჩის ბედი ეჭვის ქვეშ. შედეგად, საქართველოს ეროვნული ნაკრებმა ტურნირზე, სამი გამარჯვებით, პირველი ადგილი დაიკავა.

პირველი ტაიმი ჩვენთვის სასიამოვნოდ დაიწყო, ზაზა ფაჩულიამ სამივე მატჩში მოახერხა სადაო გდების მოგება, მარკოიშვილმა კი 2-0 დაგვაწინაურა.

მანუს არც ამის შემდეგ შეუჩერებია სვლა და ზედიზედ 3 სამქულიანი ჩააგდო, რითაც ანგარიში 17-6 გახადა. უკრაინელების შეტევისას მარკოიშვილმა ბურთი ჩაჭრა, შენგელიას მისცა პასი და თოკომაც ლამაზად ჩატენა 19-6. ანგარიში 25-10 იყო, როდესაც შენგელიამ ბურთი ჩაჭრა, მასზე არასპორტული ჯარიმა მიიღეს, თოკომ ორივე საჯარიმო გამოიყენა, ბურთი ისევ ქართველების იყო და უკრაინელები ისევ შენგელიაზე დაჯარიმდნენ, თოკომ ისევ ორივე საჯარიმო გამოიყენა. ამის შემდეგ უკრაინელებმა 2 ქულის ჩაგდება მოახერხეს, შემდეგი შეტევისას კი, შენგელიამ ორქულიანი ჩააგდო და პირველი მეოთხედის საბოლოო ანგარიში დააფიქსირა 31-12. აღსანიშნავია, რომ პირველ ათწუთეულში მარკოიშვილს 11, ხოლო თოკოს 10 ქულა ჰქონდათ.

მეორე მეოთხედი ქართველთათვის ცუდად დაიწყო და უკრაინელებმა სხვაობა 11 ქულამდე შეამცირეს 33-22. ამის შემდეგ მოედანზე შენგელია და პულენი დაბრუნდნენ, საოცრებებიც გააკეთეს და 11 ქულიანი უპირატესობა ოცქულამდე აიყვანეს. უკრაინელების ბოლო შეტევა პულენმა ჩაჭრა, პასი შენგელიას გადააწოდა და ჩვენმა იმედმაც პირველი ტაიმის ანგარიში დააფიქსირა, 52-31. პირველი ტაიმის შემდეგ, ქართველებიდან უკვე 4 კალათბურთელს ჰქონდა 10 და მეტი ქულა, შენგელია (15ქ.), მარკოიშვილი (12ქ.), ფაჩულია (10ქ.), პულენი (10ქ.).

მესამე მეოთხედში ქართველებმა პირველივე შეტევა ეფექტურად დაასრულეს, პულენმა ცინცაძეს კომბინაცია "მოპარა" და სანიკიძეს ბურთი აუგდო, ვიკამაც ალე უპი უნაკლოდ შეასრულა და ამ მატჩში პირველი და როგორც შემდეგ გამოჩნდა, უკანასკნელი 2 ქულა მიითვალა, პირადად მე, ვიკას ასეთი უსუსური თამაში არასდროს მინახავს. რამოდენიმე წუთში უკრაინელების შეტევა ფაჩულიამ ჩაჭრა, პასი შენგელიას მისცა, თოკომაც პერიმეტრზე მყოფი პულენი მოძებნა და იაკობმაც ზუსტად შეასრულა სამქულიანი, 57-33. ქართველების მორიგ შეტევაზე, ზაზამ ბოისა გაიყვანა სამიანზე, ბოისამაც არ დააყოვნა 60-35. ამის შემდეგ იყო შერმადინის ნერვების გამოცდა, მასზე უკრაინელი დაჯარიმდა და 2 საჯარიმოს სროლის უფლება მოიპოვა გიომ, მსაჯებით უკმაყოფილო ფრატელო ლაპარაკმა აიყოლია და ზაზა მაჩალაძეს ტექნიკური ჯარიმა გამოსტყუა, შერმადინმა ოთხივე საჯარიმო ზუსტად გამოიყენა, ამას ცინცაძის ორი საჯარიმოც მოჰყვა და შეხვედრაში პირველად, 30 ქულიანი უპირატესობა დაფიქსირდა, 68-38. თამაში ჩვეულ ტემპში გაგრძელდა, ბოლო შეტევა ქართველების იყო, სამსვლიანი კომბინაცია, რომელშიც მარკოიშვილი, ცინცაძე და ბოისა მონაწილეობდნენ, ამ უკანასკნელის სამქულიანით დასრულდა 75-49.

მეოთხე მეოთხედში გამოსარჩევი თითქმის არაფერია, გარდა ორი მომენტისა, როდესაც შენგელიამ ბურთი ჩაჭრა და ფაცაცია გაიყვანა პოზიციაზე, მეორე კი, თოკოს მიერ ბოლო წამებზე ნასროლი სამქულიანით დაფიქსირებული საბოლოო ანგარიში 95-69.

მატჩის და მთლიანად ტურნირის საუკეთესო კალათბურთელი, თორნიკე შენგელია გახდა, თოკომ უკრაინელებთან 23 ქულა, 5მოხსნა, 7 პასი და 3 ჩაჭრა მიითვალა. გამოსარჩევია ნატურალიზებული პულენის თამაშიც, რომელმაც 17 ქულა, 4მოხსნა და 5 პასი მიითვალა, მარკოიშვიმა კი საბოლოოდ მხოლოდ 14 ქულის დაგროვება შეძლო. უკრაინელთაგან საუკეთესო ნატიაზკო იყო, რომელმაც 14 და 5 მოხსნა დააგროვა.

საქართველო - უკრაინა 95-69 (31-12; 21-19; 23-18; 20-20)

ფაჩულია (12ქ. 5მ.), მარკოიშვილი (14ქ.), სანიკიძე (2ქ. 6მ. 3პ.), შენგელია (23ქ. 5მ. 7პ. 3ჩ.), პულენი (17ქ. 4მ. 5პ.), ბოისა (6ქ.), ცინცაძე (5ქ. 3პ.), შერმადინი (9ქ. 3მ.), ფაცაცია (3ქ.), მეტრეველი (4ქ.), ლეჟავა, ბექაური.

ფოტო: ოთარ მუმლაძე