თბილისის "დინამოს" ყოფილი მწვრთნელი ალექს გარსია კვლავ "ბარსელონაში" რომ დაბრუნდა, ეს ინფორმაცია თავად გარსიამ Geosports.ge-ს შეგვატყობინა. "ბარსას" ახალი მწვრთნელი ტიტო ვილანოვა გუნდში ცვლილებების შეტანას გეგმავს.

მისი არჩევანი ალექს გარსიაზე შეჩერდა. "დინამოს" ყოფილმა მწვრთნელმა ხორდი როუნას ადგილი დაიკავა და  კატალუნიური გუნდის მეორე მწვრთნელი გახდა. იგი "ბარსელონაში" ორი წელი დარჩება. ახალი სეზონის წინ ბატონ ალექსს ვესაუბრეთ.

- როგორ ემზადებით ახალი სეზონისთვის?

- წელს მოტივიაცია, მონდომება და დატვირთვა გაათმაგებულია. გვინდა დაწყებული საქმე გავაგრძელოთ და რაც მთავარია ტიტულები მოვიპოვოთ. ბატონი ვილანოვა პროფესიონალია და გუნდს ბრწყინვალედ იცნობს. ასე რომ, სრულ მზად ყოფნაში ვართ.

- ფეხბურთელები თუ არიან ფორმაში და გუნდის შემადგენლობაში იგეგმება თუ არა ცვლილებები?

- ჩვენი ყველა ფეხბურთელი ფორმაშია. ვილას და პუიოლს სერიოზული ტრამვა ჰქონდათ, მაგრამ საოცრება ჩაიდინეს და უკვე ჩვენთან არიან. რაც შეეხება ცვლილებებს, ჯერჯერობით არაფერს ვგეგმავთ. რადგან უკვე ყველა მოთამაშე შემოგვიერთდა, ერთობლივ მუშაობასაც დავიწყებთ.

- კმაყოფილი ხართ თქვენი საქმიანობით?

- სიმართლე გითხრათ, "ბარსაში" დაბრუნებით კმაყოფილი და აღფრთოვანებული ვარ. მსოფლიოს საუკეთესო გუნდში ვაგრძელებ მუშაობას. არაჩვეულებრივი ხალხია და მათგან საოცარ სითბოს ვიღებ.

- გუარდიოლამ "ბარსელონა" ჩემპიონი გახადა. მან გუნდისთვის დიდი საქმე გააკეთა. რას ფიქრობთ, ვილანოვა შეძლებს ამ კურსის გაგრძელებას?

- ტიტო გუარდიოლასთან ერთად მუშაობდა. ის კარგად იცნობს გუნდს. იცის მისი თამაშის სტილი. საქმის დაწყება თავიდან არ სჭირდება და დარწმუნებული ვარ წარმატებას მიაღწევს.

- მადრიდის "რეალი" თქვენთვის ერთ-ერთი ყველაზე ძლიერი და ანგარიშგასაწევი მეტოქეა. შეძლებთ მათ გადასწრებას?

- ჩვენი მთავარი ამოცანაა ჩემპიონები გავხდეთ. გეთანხმებით, "რეალი" უძლიერესი გუნდია, მაგრამ თუ ბრძოლას იწყებ, ღირსეულად უნდა დაასრულო. სწორედ ამას ვაპირებთ და დასახულ ამოცანას ბოლომდე მივიყვანთ.